Vendimi i Holandës për rikthimin e vizave, reagon ambasadori i BE

Një ditë pasi Holanda vendos rikthimin e vizave me Shqipërinë dhe ia ka kaluar kërkesën KE-së, ambasadori i BE në Tiranë, Luigi Soreca, shprehet se deri tani asgjë nuk ka ndryshuar për shqiptarët, duke shtuar se ka bindjen se qeveria shqiptare do të marrë masat që të ruhet liberelizimi i vizave.

“Asgjë nuk ka ndryshuar për momentin, kjo ka qenë e qartë edhe në njoftimin e ambasadës së holandeze, pra vijon udhëtimi pa viza në vendet e zonës Schengen. Më lejoni të them se ne e ftojmë si qeverinë shqiptare dhe holandeze të vijojnë bashkëpunimin në këto fusha kaq të rëndësishme si migracioni i parregullt dhe lufta kundër krimit të organizuar.

Udhëtimi pa viza është një arritje fantastike për Shqipërinë dhe qytetarët që do të thotë se ka pasur një progres shumë të rëndësishëm dhe është për të gjithë qytetarët që prej vitit 2010. Ju e dini besoj që unë kam qenë në krye të këtij procesi që prej vitit 2010 dhe jam i bindur se autoritetet shqiptare do të marrin të gjitha masat që të ruhet kjo arritje fantastike që është bërë deri tashmë”, u shpreh ai.